Prorektori i Universitetit Haxhi Zeka në Pejë (UHZ), Prof. dr. Edmond Beqiri së bashku me Ud. Sekretaren e Përgjithshme, Tirana Baftiu Hasani, dhe përfaqësues të tjerë të UHZ-së, pritën në takim përfaqësues të Bankës Kombëtare Tregtare në Pejë (BKT).
Qëllimi i këtij takimi ishte diskutimi dhe hulumtimi i mundësive për një marrëveshje bashkëpunimi. Përfaqësuesit e BKT-së prezantuan ofertat dhe mundësitë e tyre në fushën e bashkëpunimit, duke u fokusuar në përfitimet që mund të ofrojnë për punonjësit dhe studentët e UHZ-së.
Përveç ofertave të tyre, përfaqësuesit e BKT-së paraqitën disa bonusë tërheqës për klientët e tyre të rinj. Ku përfshihen llogari pa pagesë dhe pa kosto të mirëmbajtjes mujore, mundësi për marrjen e kredive deri ne 2000€ me një normë interesi prej 0%. Përfitime të pagesave në terminalët POS, si dhe shumë transaksione tjera.
Po ashtu, hapja e llogarive pa pagesë për studentët e UHZ-së dhe mbajtja e tyre pa asnjë kostë deri në moshën 23 vjeç.
Ky takim paraqet një hap të rëndësishëm në zhvillimin e marrëdhënieve midis institucionit të arsimit të lartë dhe një institucioni financiar të rëndësishëm si BKT, duke hapur rrugën për një bashkëpunim të frytshëm dhe të përparuar në të ardhmen.
