Universiteti i Shkodrës Luigj Gurakuqi (ULG) vizitoi Universitetin Haxhi Zeka në Pejë (UHZ) me qëllim të thellimit dhe zgjerimit të bashkëpunimit të tyre të ndërmjetëm në fushën e arsimit dhe shkencës.
Në vizitën e tyre, përfaqësues nga Universiteti i Shkodrës ishin Rektorja Suzana Golemi, Prorektorja Rajmonda Kqija, Dekanja e Fakultetit Ekonomik Blerta Dragusha, Dekani i Fakultetit të Drejtësisë Gasper Kokaj, Dekani i Fakultetit të Shkencave të Edukimit Fatmir Vadohej dhe Dekani i Fakultetit të Shkencave të Natyrës Rrok Smajlaj. Të gjithë ishin të interesuar të zhvilluar diskutim të hapur dhe të gjenin mënyra për të forcuar bashkëpunimin e tyre në të ardhmen.
Rektori i Universitetit Haxhi Zeka, Prof. Dr. Armand Krasniqi, mori fjalën dhe i falënderoi të pranishmit për vizitën e tyre, duke theksuar rëndësinë e këtij takimi për të ndarë përvojat dhe idetë në fushën e arsimit të lartë. Ai prezantoi përfaqësuesve nga ULG punën e UHZ-së dhe arritjet e tij në promovimin e cilësisë së arsimit dhe shkencës.
Në përfundim të takimit, ata vizituan me interes kampusin e fakulteteve të Universitetit Haxhi Zeka, duke njohur mjedisin dhe burimet që ofrohen për studentët. Të dyja palët u zotuan për një bashkëpunim të vazhdueshëm dhe të pasur në të ardhmen, duke identifikuar sfidat dhe mundësitë për të rritur nivelin e cilësisë së arsimit dhe për të promovuar zhvillimin e shkencës në vendin tonë.
